Béowulf - In Níwre Wrítunge

Fram Wikibooks
Jump to navigation Jump to search

Inlád Béowulfes

Hwæt! Wé Gárdena in géardagum, þéodcyninga-- þrym gefrugnon. hú þá æþelingas ellen fremedon. Oft Scyld Scéfing, sceaðena þréatum monegum mǽgðum meodosetla oftéah; egsode Eorle siþþan ǽrest wearþ féasceaft gefunden, hé þæs frófre gebád:- wéox under wolcnum, weorþmyndum þáh, oþ þæt him ǽghwilc þára ymbsittendra ofer hronráde hýran scolde, gomban gyldan:- þæt wæs gód cyning! Þǽm eafera wæs æfter cenned geong in geardum, þone god sende folce tó frófre; fyrenþearfe ongeat þæt híe ǽr drugon, aldorléase lange hwíle; him þæs líffréä, Wuldres Wealdend, woroldáre forgeaf: Béowulf wæs bréme --blǽd wíde sprang-- Scyldes eafera, Scedelandum in. Swá sceal geong guma góde gewyrcean, fromum feohgiftum, on fæder bearme, þæt hine on ylde eft gewunigen, wilgesíþas, þonne wíg cume, léode gelǽsten: lofdǽdum sceal, in mǽgða, gehwǽre, man geþéön. Him þá Scyld gewát tó gescæphwíle,

felahrór, féran, on Fréan wǽre; hí hyne þá ætbǽron tó brimes faroðe, swǽse gesíðas, swá hé selfa bæd, þenden wordum wéold, wine Scyldinga, léof landfruma, lange áhte; þǽr æt hýðe stód hringedstefna, ísig ond útfús, æðelinges fær; álédon þá léofne þéoden, béaga bryttan, on bearm scipes, mǽrne be mæste; þǽr wæs mádma fela, of feorwegum frætwa gelǽded; ne hýrde ic cýmlícor céol gegyrwan hildewǽpnum ond heaðowǽdum, billum ond byrnum; him on bearme læg mádma mænigu, þá him mid scoldon, on flódes ǽht, feor gewítan; nalæs hí hine lǽssan lácum téodan þéodgestréonum, þonne þá dydon þe hine æt frumsceafte forþ onsendon ǽnne ofer ýðe umborwesende; þá gýt híe him ásetton segen gyldenne, héah ofer héafod; léton holm beran, géafon on gársecg, him wæs geómor sefa, murnende mód; men ne cunnon secgan tó sóðe, selerǽdenne hæleþ under heofenum, hwá þǽm hlæste onféng.