Þæt Luces Godspell:Capitol 12

Innung | Forestapol Capitol | Níehsta Capitol

1 mycelum weredum him embe standendum þæt hig hine trædun; þa cwæþ he to his leorningcnihtum warniað wiþ farisea lare þæt is licetung;

2 Soðlice nis nan þing oferheled: þe ne beo unheled. ne behydd þæt ne sy witen:

3 forþǣm þe þæt ge secgað on þystrum beoð on leohte sæde and þæt ge on earum spræcun on beddcofum biþ on hrofum bodud;

4 Ic secge eow minum freondum ne beo ge bregyde fram þǣm þe þone lichaman of sleað. and nabbað syþþan hwæt hig ma don;

5 Ic eow ætywe hwæne ge onldredon: adrædað þone þe anweald hæfþ seððan he of slyhð on helle asendan:

6 þus ic eow secge adrædað þone. ne becypað hig fif spearwan to helflinge. and an nis of þǣm of ergyten beforan gode.

7 ac ealle eowres heafdes loccas sind getealde; Ne adræde ge eow ge sind beteran manegum spearwum;

8 Soðlice ic eow secge swā hwylc swā me andet beforan mannum. þone mannes sunu andet beforan godes englum;

9 Se þe me wiþsæcþ beforan mannum: se biþ wiþsacen beforan godes englum:

10 and ǣlc þe segð ænig word agen mannes sunu þǣm biþ forgifen; þǣm þe wiðersacað ongen haligne gast. ne biþ þǣm forgifen;

11 þonne hig lǣdaþ eow on gesamnunga and to dugeðe ealdrum: and to anwealdum: ne beo ge embeþencynde: hu oþþe hwæt ge sprecon. oþþe andswarian.

12 halig gast eow lærþ on þære tide þa þing þe eow sprecan gebyraþ;

13 þa cwæþ sum of þǣm menegum; Lareow. sege minum breþer þæt he dæle uncer æhta wiþ me;

14 þa cwæþ he. la man. hwa sette me deman: oþþe dǣlend ofer inc;

15 þa cwæþ hē: gīemaþ and warniaþ. wiþ ǣlce gytsunge. forþǣm þe nis nanes mannes lif on gytsunge of þǣm þe he ah;

16 þa sæde he him sum bigspel; Sumes weliges mannes æcer brohte forð gode wæstmas:

17 þa ðohte he on him sylfum: and cwæþ; Hwæt do ic forþǣm ic næbbe hwyder ic mine wa stmas gadrige;

18 þa cwæþ he þus ic do: ic towurpe mine bernu and ic wyrce maran: and ic gaderige þyder eall þæt me gewexen ys: and mine god

19 and ic secge minre sawle eala sawel þu hæfst mycele god: asette to manegum gearum. gerest þe: et. and drinc and gewista;

20 þa cwæþ god to him; La dysega on þisse nihte hig feccað þine sawle fram þe: hwæs beoð þa ðing þe ðu gegearwudest;

21 Swā is se ðe him sylfum strynð: and nis welig mid gode;

22 þa cwæþ he to his leorningcnihtum. Forþǣm ic eow secge ne beo ge ymbehydige eowre sawle hwæt ge etan. ne eowrum lichaman hwæt ge scrydun;

23 Seo sawul ys ma þonne se lichama: and se lichama ma þonne þæt reaf;

24 Besceawiað þa hrefnas þæt hig ne sawað ne ne ripað: nabbað hig heddern ne bern: ac god hig fett. þæs þe ma ge sind hyra selran;

25 Hwylc eower mæg þencende ican ane elne: to his anlicnesse.

26 gyf ge þæt læsse ne magon. hwy sind ge be oðrum þingum ymbehydige;

27 Sceawiað þa lilian hu hi wexað. hi ne swincað ne ne spinnað; Soðlice ic eow secge þæt salomon on eallum hys wuldre næs gescrydd. swā þissa an;

28 Gyf god scrytt þæt hig. þe ys todæg on æcere: and tomorgen forscrincð; Swā mycele ma god scryt eow gehwædes geleafan;

29 And nelle ge secean hwæt ge eton oþþe drincon: and ne beo ge up ahafene

30 ealle þas þing þeoda seceað; Eower fæder wat þæt ge þises beþurfon;

31 þeah hwæþere seceað godes rice and ealle þas þing eow beop geihte;

32 Ne ondræd þu þe la lytle heord. forþǣm eowrum fæder gelicode eow rice syllan;

33 Syllaþ pæt ge agon and syllað ælmessan: wyrcað seodas þa ðe ne forealdigeað. Ungeteorudne goldhord on heofenum. þyder ðeof ne genealæcð. ne moþþe ne gewemð;

34 þar eower goldhord is. þar biþ eower heorte:

35 Sin eower lendenu begyrde and leohtfatu byrnende:

36 and beo gelice þǣm mannum þe hyra hlafordes abidað hwænne he sy fram gyftum gecyrred. þæt hig him sona ontynon þonne he cymð and cnucað;

37 Eadige sind þa þeowas þe se hlaford wæccende gemet þonne he cymð; Soðlice ic eow secge þæt he begyrt hine and deð þæt hig sittað. and gangende him þenað;

38 And gif he cymð on þære æfteran wæccan. oþþe on þære þriddan and þus gemet. eadige sind þa þeowas;

39 Witað þæt gif se hiredes ealdor wiste hwænne se þeof cuman wolde. witodlice he wacude and ne geþafude þæt man his hus underdulfe;

40 And beo ge wære forþǣm þe mannes sunu cymð þære tide þe ge ne wenað;

41 þa cwæþ petrus drihten. segst þu þis bigspell to us hwæþer þe to eallum;

42 þa cwæþ drihten. hwa wenst þu þæt sy getrywe and gleaw dihtnere: þæne se hlaford geset of er hys hired þæt he him hwætes gemet on timan sylle;

43 Eadig is se þeow þe his hlaford gemet þus donde þonne he cymð;

44 Soðlice ic secge eow þæt he gesett hine of er eall þæt he ah;

45 Gyf þonne se þeow cwyð on hys heortan min hlaford uferaþ hys cyme. and agynð beatan þa cnihtas and þa þinena. and etan and drincan and beon of erdruncen.

46 þonne cymþ þæs þeowan hlaford on þǣm dæge þe he ne wenð. and þære tide þe he nat. and todælþ hine. and sett his dæl mid þǣm ungetreowum;

47 Soþlice þæne þeow þe his hlafordes willan wiste and ne dyde æfter his hlafordes willan: he biþ witnad manegum witum;

48 þone þeow þe his willan nyste and þeah dyde he bit witnad feawum witum; Elcum þe mycel geseald is. him man mycel to secð: and æt þǣm þe hig micel befæstun hig mycel biddað;

49 Fyr ic sende on eorþan and hwæt wylle ic buton þæt hit bærne;

50 Ic hæbbe on fulluhte beon gefullod: and wene ge. hu beo ic geþread. oð hyt sy gefyllyd.

51 forþǣm þe ic com sybbe on eorþan sendan: ne secge ic eow ac todal;

52 Heonon forð beoð fife on anum huse todælede. þry on twegen. and twegen on þry.

53 beoð todælede; Fæder on sunu and sunu on his fæder. modor on dohtor and dohtor on hyre modor; Swegr on hyre snore: and snoru on hyre swegere;

54 and he cwæþ to þǣm folce. þonne ge geseoð þa lyfte cumende on westdæle. sona ge cweðað storm cymð and hit swā biþ;

55 And þonne ge geseoð suðan blawan ge secgað þæt is towerd and hit biþ;

56 La liceteras cunne ge afandian heofones ansyne and eorþan. humeta na afandige ge þas tide;

57 Hwi ne deme ge of eow sylfum þæt riht is;

58 þonne þu gæst on wege mid þinum wiðerwinnan to hwylcum ealdre. do þæt ðu beo fram him alysed: þe læs he þe sylle þǣm deman. and se dema þǣm bydele: and se bydel þe sende on

59 Ic secge þe ne gæst þu þanone ær þu agylde þone ytemystan feorðling;