Ōhthere and Ƿulfstān

Fram Wikibooks
(Edlæded fram Ōhthere and Wulfstān)

Ōhthere sæȝde his hlāforde, Ælfrǣde cyninge, þæt hē eallra Norþmanna norþmǣst būde. Hē cƿæþ þæt hē būde on þǣm lande norþƿeardum ƿiþ þā Ƿestsǣ. Hē sæȝde þēah þæt þæt land sīe sƿīðe lang norþ þanan, ac hit is eall ƿēste, būtan on fēaƿum stōƿum styccemǣlum ƿīciaþ Finnas, on huntoðe on ƿintre and on sumore on fiscoðe be þǣre sǣ.

Hē sæȝde þæt hē æt sumum ċierre ƿolde fandian hū lange þæt land norþrihte lāge, oþþe hƿæðer ǣniȝ mann be norðan þǣm ƿēstene būde. Þā fōr hē norþrihte be þǣm lande: lēt him eallne ƿeȝ þæt ƿēste land on þæt stēorbord and þā ƿīdsǣ on þæt bæcbord þrīe dagas. Þā ƿæs hē sƿā feorr norþ sƿā hƿælhuntan fierrest faraþ. Þā fōr hē þāȝīet norþrihte sƿā feorr sƿā hē meahte on þǣm ōðrum þrim dagum ȝesiȝlan. Þā bēag þæt land þǣr ēastrihte, oþþe sēo sǣ inn on þæt land— hē niste hƿæðer— būtan hē ƿiste þæt hē þǣr bād ƿestanƿindes and hƿōn norðan, and siȝlde þā ēast be lande sƿā sƿā hē meahte on fēoƿer dagum ȝesiȝlan. Þā scolde hē þǣr bīdan rihtnorðanƿindes, forþǣm þæt land bēag þǣr sūþrihte, oþþe sēo sǣ inn on þæt land— hē niste hƿæðer.



Wikibooks:Stǣr bōcscielfe